إرهاصات ثوريـــــــــة

فى البداية هيكون فيه مجموعه من الكتابات تعود للأيام الأولى للثورة ولحد من شهر تقريبا ...قررت أعمل لها إسم واحد ارهاصات ثورية ..

الإرهاصة الخامسة 9 فبراير 2011

قوائم بيضاء وقوائم سوداء وقوائم تيريكيوااااااااااااااااز

فى الفتره الماضيه صنفت العالم

ايشى اسود وايشى ابيض وايشى بعيد عن السامعين احمر احمر احمر

فى الاول اتعفرتت وقلت يا سلام يعنى ايه فنان يقول الكلام ده

يعنى ايه فنان مع النظام

وتقريبا بعيد عنكم كانت صايبانى البلاهه لدرجه ان من كتر الحمقه قلت انا هصنفهم ابيض واسود وهشن حمله شعواء عليهم بانى هقاطع افلامهم

وفضلت اشنع بقى وارش البنزين عالنار

واقول لا... والف لا... لكل واحد شتم فى الثوره.

وقررت اعاقب كل ممثل ضايقنى بانى ببساطه مش هيشوف من جيبى ولا قرش..ولما هيطل غصب عنى عالشاشه هحول

واخدت ده منهج وكأنى بناضل ....قلت ده عقابى لكم

واتناقشت مع الناس  وقالوا لى .....

-         الله هم بشر من حقهم يعبروا عن رايهم

-         اه طبعا

-         انتى ليه بتهاجميهم ؟ من حق اى فنان يقول رايه

-         طبعا بس الفنان حد مش عادى ده حد له معجبين او معجبات وممكن يتأثروا برايه

-         يا سلام؟

-         اه طبعا يعنى هم بيحرضوا الناس ضد الثوره وللا بيشتغلوا مع النظام  وللا ايه بالضبط؟

-         يا سلام انتى سوداويه وكمان متحامله

-         يا جماعه افهموا الفنان ممكن يسكت خالص بس بلاش يقول دول عملاء وخونه ويكدب على روحه .......وللا هو عشان القهر ملاه بقى مش مصدق ان حد ممكن يتغير فبيشترى النظام ,على اساس انه نظام لا يتغير لا ببرسيل ولا حتى بكلوركس .....وان النظام هو بابا وماما وانور وجدى كمان ....

يعنى قعدت اقلبها فى راسى ولقيت انى مش بالعه المبرر بتاع اللى بحاوره ومبررى كمان مش عاجبنى – يبدو ان الحاجه بتاخد جوايا وقت طويل لحد ما تستوى –

واخيرا فهمت

الفنان يجب ان يكون ذو رؤيه والا تحول لمهرج بالقصر واراجوز

والبلد مش ناقصه اراجوزات وبدل ما ادفع 40 جنيه تذكرة سينيما عشان اتفرج على فنان جاهل ... اوفرهم واروح السيرك ب10 جنيه وهناك الاراجوزات بالهبل او انزل اى مولد واهو فولكلور برضه

والنايبه السودا بقى كانت لما حاولوا يغيروا موقفهم لما الفريق بتاع مصر كسب ههههههههههه

قالوا لك ايه يا استاذ يا محترم ....احنا اتغرغر بينا

وما كناش نعرف وكان مضغوط علينا ( مع انه لو حط لسانه فى بقه كان ماحدش يضغط عليه ولو اعتزل فلوسنا تعيشه ملك باقى عمره )

ومنهم اللى استعمانا وخلانا طرش عينى عينك وقال لك لا انا ما قلتش وكان قصدى المغرر بيهم فى التحرير البلطجيه – يا حرام اصلنا شعب ظنان فما فهمناش البيه والهانم الفنانييييييييييييييين

فعلا فنانين فى الكدب والتلون ......اساتذه

ومنهم اللى طلع يدمع ويقول يا جماعه انتوا مش فاهمين احنا كان بيجرى فينا ايه وللا بينضغط علينا ازاى

ومنهم اللى ادعى الجهل اصل ما بيقروش جرايد ........طاب البعيد مغيب يبقى يتخرس

اسفه لا اقبل موقف الفنانين او المشخصاتيه لان كلمه فنان خساره فيهم

وصدقونى حسابكم معانا عسير مش انتقام لا بالعكس تجاهل تام .......تجاهل يخليهم يعيدوا تفكيرهم فى نفسهم كبشر

القوائم البيضا منها كل فنان حط وطنه فوق راسه ونزل مع الناس كمن اول او تانى اوتالت يوم يعيش معاهم وبان موقفه

السودا على كل واحد شتم وقل قيمته وقال عيال مضلله ومش فاهمين وراح زى الشاطر مصطفى محمود يشتم فينا مش يؤيد حبيبه .... وابقوا قابلونى لو حد عبركم تانى باعلان لبان سماره حتى

التركواز بقى دول حبايبنا بتوع مطرح ما ترسى دق لها واراجوز متأرجز بالف لون ومع الرايجه

بجد عيب