إرهاصات ثورية

فى البداية هيكون فيه مجموعه من الكتابات تعود للأيام الأولى للثورة ولحد من شهر تقريبا ...قررت أعمل لها إسم واحد ارهاصات ثورية ..

الإرهاصة الأولى -  2 فبراير 2011

عملها أبو لهـــب

ساكتب بالعاميه وارجو العذر

من أيام كنت لا اقرأ جريده ولا ارى قناه اخبار ولا شىء ولا اهتم اساسا بما سيحدث لان السيناريو هو ذاته منذ اواخر ايام جمال عبد الناصر لليوم

كنت يأسه ومهمومه وماشيه مع القطيع او على الاقل لا بأيد ولا برفض مواطنه ضمن المواطنين

اخجل من مصريتى لا لشىء الا لما آل اليه حال المصريين مافيه دوله الا لما بنتهان فيها .... المصرى خانع المصرى فهلوى المصرى ماله كلمه المصرى بياكل اخوه ...كانت حقايق احيانا بشوفها واسمعها ويغلى الدم فى نافوخى وما اقدرش افتح بقى .

النهارده ومن يوم الثلاثاء قبل الماضى تغير رايى شعر ت بشىء جديد بيدب فى عقلى وقلبى ومش كلام انشاء اللى بقوله

الريس رافض راى بعض الناس ولا عاوز يسمع ولا يشوف

معتمد على ودان غيره وعيون غيره ...

عيون وزير الداخليه : ياريس حبه عيال خرزانه تفرقهم روق بالك

صفوت الشريف : ياريس الناس بتحبك وبما انه رئيس مخابرات سابق نسى ان الزمن بيتغير وان نشيد اخترتاك من اخراعاته

الريس بيعتبر ان اللى عنده 65 سنه عيل بدليل ان اى وزير النونو فيهم يعنى ولسه فيه الرمق سنه 70 طبعا ده طفل بالنسبه لرئيس تجاوز التمانين  وكأن مصر عقمت بعد مواليد سنه 40 مثلا على ابسط تقدير

الاولاد بتوع التحرير او قاده الثوره الشعبيه الحره لا عاوزين حكم ولا طمعانين فى حاجه عاوزين يعيشوا بكرامه ......

طبعا ده مطلب رهيب بالنسبه للسلطه.....

بيفكروا يا نهار اسود

العيال دى طلع لها مخ منين يا حبيب يا عادلى؟؟؟؟؟؟

النظام فشل فى مسح عقول قله مندسه هههههههههههه

كلام عبييييييييييييييييييط

بجد مهين للكرامه ويدعو للخجل

على طول فيه قله مندسه ودول تريد الفتك بمصر والشباب مغيب وقوى اجنبيه.....

ملحوظه فى النص كده : نتانياهو يؤيد نظام مبارك

اللى بيتكلم مجنون فالمستمع لازم يكون عاقل

نمشى يوم بيوم

25 يناير مطالب مسالمه من قله مندسه تبلغ تقريبا بضع الاف واسقاط النظام هههههههههه

سابنا نعوى زى الكلاب وزى ماهو عامل له سنين سيبهم يتسلوا اللى يقول يقول

5 ايام والريس واى مسئول رافض يفتح بقه

تمخض الجبل فأولد فارا

وجاء اول خطاب مهيييييييييييييييييين

مهين لاى عقل واى منطق

الشرطه فرمت العيال والنسوان فرمتهم .......انا مصريه وعارفه يعنى ايه الشرطه تسيب عالناس ....... بتسحلهم

قرار بتشكيل حكومه جديده .....

غير لى وزير الداخليه والصحه والماليه وكام وزير كده ....و2 بياقه وواحد بكم طويل .

وفضل اس الفساد صفوت الشريف والترزى فتحى سرور

ثم فجأه انسحب الامن تماما وكأنهم فص ملح وداب ....

اللى فى السجون رغم عدم وجود نت او موبايل اهاليهم حصل بينهم تواصل تليباثى سبحان الله وطلعوا كلهم فى نفس الوقت عالسجون يدمروها او ان المساجين بقى اهاليهم بتاخد عناوين بعض على اساس يتواصلوا

ولاول مره يجتمع الشعب المصرى على قلب رجل واحد وهوب تسلحوا وهجموا عالسجون والاقسام

سبحان الله

برضه يعنى ادينى عقلك

وسبحان الله برضه كلهم مسلحين مع ان اللى فى بيته سكينه مطبخ ممكن يتحاكم بتهمه احراز سلاح؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

سيبنا من كل ده

استفزاز للولاد .....قالوا اسقاط الرئيس

برضه احنا شعب طيب والله العظيم

يعنى لا قالوا يتحاكم ولا يتسجن ولا يتشنق مازلنا نعامله بمنتهى الود رغم السبعين مليار ...يا عمنا ارحل فحسب

الا انه فجأه تلبسته روح لعنه الفراعنه بجد هو وهامان واتباع فرعون موسى واخذته العزه بالاثم قائلا فى نفسه انا ربكم الاعلى

مسلسل حرائق اهبل

نهب وسلب اهبل

عملنا لجان شعبيه وقلنا هنحمى بعض

اتغاظ الطاغيه وبدأ يلسن على الاولاد انهم عملا وانهم وانهم التليفزيون المصرى روج لده وقال فراغ سياسى وان الامان مبارك

لا اله الا الله ...........الامان ربنا وهم قالوا الامان مبارك

ماشى اوكى

قال لك فيهم اخوان وفيهم وفيهم ......

الاخوان كسفوه الله يكسفهم قالوا مش عاوزين حاجه

بيقولك يا سيدى العيال دول  من جميع فئات الشعب مسلم مسيحى اخوان ويساريين ولو فيه شيوعيين رغم انهيار نظامهم برضه كنا هنلاقيهم يعنى الكل مع الكل دون فصل

الكل عاوزها سلميه .....وهو ونظامه القديم والبلدى بجد مصر انها حرب

الصبح احس ان يا سلام مصر هتتحول ونعيش بجد ييجى على الليل اتفرج عالقنوات المصريه اكتئب واحس بالخزى

اما عن الفنانين اللى بجد انا كمواطن صنفتهم وفرزتهم فحدث ولا حرج قله خرجت محترمه منهم الاستاذ عمارا لشريعى وخالد يوسف وخالد النبوى وشريهان بجد عالم محترمه واحمد حامى وخالد الصاوى ......

الكثيرين بجد فنانين محترمين ومنهم كثيرين لا اذكرهم ولم يعلنوا عن موقفهم

اما الباقين الخائفين على ملايينهم .... اقول لهم عيييييييييييييييييب .... عيب انك تشكك فى غيرك وتلمح تلميحات سخيفه منها مثلا شكرا عملتوا اللى عليكم كفايه بقى ...او انا قدام بيتى قاعد بحرس وممكن اجيب بروجكتر انزل به التحرير اورى الشباب دول ازاى الغرب بيلعب بيهم...

الفروسيه يا اخ مش حصان يتركب

 بجد عيب عليكم انا بقولكم عيب...

انا عاوزه اسئلهم سؤال واحد لو الحال اتغير واللى عالكرسى نزل يا ترى هيكون كلامكم وقتها عامل ازاى؟

منظركم قدام جمهوركم هيكون ايه؟

نرجع مرجوعنا

 طلع علينا واحد كده اسمه احمد شفيق ... بجد لولا الخجل لقلت فيه ما لايقال لانه ببساطه لا يعطى اجابات

ولا كلمه تعرف تمسكها عليه

هكمل بعدين او فى يوم تانى بقيه الحدوته

بس يا ترى لسه لحد النهارده ما عرفوش مين اللى عمل هجوم قريش بالسيوف والجمال على المهاجرين لميدان التحرير

اراهنكم هيطلع ابو لهب......

سلام