أرهاصات ثوريــــــــــــــــــــة

فى البداية هيكون فيه مجموعه من الكتابات تعود للأيام الأولى للثورة ولحد من شهر تقريبا ...قررت أعمل لها إسم واحد ارهاصات ثورية ..

الإرهاصة الرابعه  مارس  2011

ما احلى الرجوع اليه

التعديلات الدستوريه

الشغل الشاغل لكل مصر تقريبا هذا بعدما رحمنا رب العالمين من الدورى واسعار اللاعبين ومسلسلات رمضان التى اتمنى ان يمن الله علينا برحمته وبركاته ونتخلص منها.

المهم

طبعا بما انى كنت مواطن صالح جدا لاكثر من 30 سنه وكنت عامله توكيل روحانى للحكومه انها تصوت بدالى وتندب وتشد شعرها كمان فى كل شىء فى الحياه وفى كل شىء يخص البلد دى

من كتر ما انا مش بشارك نسيت اسمها !!!!!!!!!!!!!!!!

وبصراحه اكتر الحكومه الله يرحمها ويبشبش الطوبه اللى تحت راسها كانت قايمه بالواجب تالت ومتلت ... ومريحه المواطن على الاخر ......لا بتعب روحى ولا انزل ولا حتى اطلع بطاقه انتخابيه حتى دى الحكومه يا عالم وعارفه كل حاجه وهى ادرى بمصلحتنا بس هى كانت مقصره فى حته انها ما كانت بتقول لنا كمواطنين نطبخ ايه كل يوم.

وطبعا ده كان موضوع مسبب لنا كمواطنين شرفاء عقلاء حيره مميته

وكل الستات والرجاله كانت محتاره وحديثهم اليومى وسبب الخناقات فى البيوت وساعات سبب خرابها هو هنطبخ ايه النهارده

ولان الحكومه مشاغلها كانت كتيره الله يكون فى عونها فقالت المواطن لازم ينضج ويكبر بقى ويقرر بروحه هيطبخ ايه؟ وساعدتنا بان برامج الطبيخ فى التليفزيون بقت اكتر من اى برامج تانيه

هو مش بيقول لك المطبخ السياسى؟؟؟؟؟؟؟؟؟؟؟

بعد ما ماتت الحكومه اتكشفنا يا ساده ......بقينا ملط لا دستور يلم ولا حكومه تهم ........ملط

وكل واحد عاوز يستر نفسه

ناس عاوزه تفضل عريانه وتقول لك لا والف لا افضل عريان كام شهر وبعدها اتغطى ببدله صوف انجليزى من بتاع السعوديه ....حاجه محترمه تدفى

وناس تقول لك نعم نعم ..........!!! وانا هفضل ملط لحد ما الصوف ييجى ........لا يا عم انا عاوز حته خرقه تدارى العوره وخلاص

وما بين الاتنين كل واحد له مبرراته

زاد وغطى بقى انه طلعت فتوى بتقول لك اللى هيدارى عورته بس هيدخل الجنه ... وده منتهى امل كل شعوب الارض طبعا ....الجنه ...ماهى مش هتبقى جهنم هنا وهناك كمان

وبما انى من حزب الملط فقررت انى هستنى البدله الصوف

انا زهقت من لبس المرقع ثم انا ست يعنى هدارى ايه وللا ايه والحته اللى هنستفتى عليها يادوب تدارى جزء واحد وبرضه هتفضل باقى الاجزاء ملط ومش بعيد بعد كده ياخدوا منا الحته اللى هنقبل نتستر بيها على اساس اننا بلد ناميه والحكومه هتحتاجها فى يوم.

ولو كلنا بقينا عريانين من غير دستور لفتره مش هناخد بالنا لاننا كلنا هنبقى فى الهوا سوا عريانين ... انما لو اتغطينا بالترقيع اكييد اكيد هنشوف عورات بعض تمام التمام...

المصريين ناس طيبه جدا بصراحه وبتعتبر كلمه لا قله ادب!!!

مش عارفه ليه

لو قلت لا على كوبايه شاى تبقى قليل الذوق ....ولو قلت لا لواحد رخم جاى يزورك من غير معاد تبقى براوى ...ولو قلت لا لابوك وامك وهم بيغصبوك تحقق احلامهم هم مش انت تبقى ولد عاق

ولو قلت لا فى الجامعه تبقى عيل فلتان

ولو قلت لا فى الشغل تبقى موظف بتاع مشاكل

ولو قلت لا فى بيتك تبقى راجل مش اوبن مايندد

ولو قلت لا للحكومه تبقى معاك اجنده وعميل

عشان كده نعم هى اقصر الطرق للحصول على رضا الجميع الا نفسك

لو قلت نعم هترجع ريما لعادتها القديمه وبرضه مش هترضى نفسك

صدقنى يا ابن الحلال لو المره دى بس قلت لا صدقنى مش هتقع فى حفره الفراغ الدستورى ولا اى حفره تانيه

لو قلت لا المره دى بس بعدها ينفع تقول نعم للى انت عاوزه مش المفروض عليك

ساعتها هتلاقى نفسك وتحقق حلمك وتقابل الانسان الحر اللى جواك

ادينا قلنا اه وبرضه لا اتسترنا ولا حاجه وماشيين ملط

وفى الحالتين انا فى وادى وبلادى فى وادى ولا حد فاهم حاجه