فى البداية هيكون فيه مجموعه من الكتابات تعود للأيام الأولى للثورة ولحد من شهر تقريبا ...قررت أعمل لها إسم واحد ارهاصات ثورية ..
الإرهاصة العاشرة مايو 2011
بيرو
من البدايه من أول وفاء قسطنطين ولحد كاميليا وعبير والقصه دى مش داخله دماغى
مسببه لى نوع من زعزعة العقيده فى صدق القصه وحاسه انه فيلم هندى عبيييييييييييييط جدا من بتوع السبعينات
طلعت علينا مدام كاميليا قالت ووشها بيضحك - رغم انها سابت البلد تتمرمط عشانها كتير اوى - انا أومرى ما كنت مسلم...
بارك الله فيكى يا اخت كفى الله المؤمنين شر القتال ...ربنا يكرمك
بس هو ما كانش ينفع حضرتك يعنى حس الوطنيه ده ينقح عليكى من كام شهر ؟؟؟؟؟؟؟
عامه كتر خيرك
العيب مش عليها هى حره تنفى او تقر او تختفى
العيب على الفطاحل اللى بشنبات اللى دايرين عاوزين اختنا كاميليا
يا اخى والله امركم عجيب
بدل ما تدور على مسيحيه اسلمت ورجعت بقت مسيحيه او اختطفت وللا كفرت حتى
ادعم مسلميك اللى ميتين جوع
اعمل مظاهره للايتام اللى مش لاقيين دعم
اعمل وقفه للى بيموتوا كل يوم من السرطان والكبدالوبائى
حس شويه ببلدك وانها مغتصبه ولازم ترجع شرفها الضايع
اصرخ واشجب وندد عشان الستات اللى بتتهان كرامتهم ليل نهار فى المواصلات ومن المديرين ومن كل من له سطوه عشان أكل العيش
انما مرمطه عشان واحده الكنيسه بيشاع انها منعتها الاسلام
عيب
قسما برب العزه عيب ...ده احنا كده مش رجاله ده احنا كده اى شىء تانى الا اننا بننصر الحق
تعتقد اخى ذو الوقفه الشامخه ايهما افضل القتال فى سبيل فرد ام فى سبيل افراد ؟؟؟؟
خلصنا من كاميليا الا وتطل لنا بيرو!!!
صلاة النبى احسن على راى الدقن الله يرحمه
بيقولك قال الكنيسه خطفت مراتى يا عالم يا هو الحقونى
هى الكنيسه تخصص خطف نسوان؟؟؟؟؟؟؟؟ اللى ما سمعت بيوم انها احتجزت لها دكر
ثم ليه ما سمعناش ان الكنيسه خطفت دكتوره وللا مهندسه وللا بت من بتوع الايه يو سى وللا الكنيسه دى ما بتقدرش الا على الهاربات المارقات الجامعات بين الازواج؟؟؟؟؟؟؟؟؟
ثم انا اسفه جدا جدا الراجل اللى يقول مراتى الكنيسه خطفتها ده راجل اسفه فى اللفظ خرونج مش كينج كونج
اصل الكنايس مش طالقه قساوستها وخدامها يخطفوا فى النسوان من الشارع
واللى عاوز يتنصر معناه انه مر باجراءات كتيره منها التردد – اضعف الايمان - على الكنيسه او راح وعظات الاحد او قام بأى اجراء على مدى طويل عشان يوصل انه يتنصر ...
يعنى مش نامت قامت قالت انا تريز مش خديجه انا جاهزه للخطف ....هلموا يا رجال الكنائس
والبيه جوزها ده كان نايم على ودانه وهى بتنسحب من الاسلام للمسيحيه وللا ايه بالضبط؟
لو اللى بيتكلم مجنون فالمستمع لازم يكون عاقل
وفين دور الزوج الهمام وهى بتنسحب من دين لدين ليه ما وعظهاش ووداها لشيوخ ينصحوها وقام بدوره فى القوامه ؟ وللا هو فالح بس يجرى الحقونى مراتى اتخطفت ؟ لو مراتك اتخطفت وانت مش داريان انها بتتنصر ...اسفه جدا ..دارى بلوتك واتكتم .
ولو الكنيسه زى ما بيشاع بتوزع اكل وشرب وفلوس عشان تبشر بالمسيحيه وكأننا فى الادغال الافريقيه ...واحنا صدقنا ده طيب جنابك ما سئلتش روحك الاكل والشرب الزايد اللى ببيتك ده جه منين؟ وللا انت فالح بس تملا بطنك وجيوبك وتتعامى ومادام مش جنب طينك يبقى ما لكش فيه؟ لا يا عم الزوج المقهور اسفه انت اساسا كده مش نافع ...
حاجات كتير تخلى الواحد عقله يشت وتخلينا نفكر فى ملكوت ربنا وفى البشر اللى بجد تفرقوا وتفرغوا لصغائر الاموروافرغوا الدين من محتواه
على فرض مصر كلها بقت مسيحيه هل ده هيضير الاسلام فى شىء؟؟؟؟؟؟؟؟
لو مصر كلها بقت مسلمه هل هتنقص المسيحيه وتتضعضع اركانها؟؟؟؟؟؟
مابالكم بواحده او اتنين او ميه او ألف حتى غيروا دينهم...يا عالم هم احرار ...كل واحد حر يسلم بتنصر يكفر حتى هو حر
اللى بيسيب دينه لدين تانى معناه انه مش مقتنع بالدين اللى هو عليه والعيب يا اما فيه كشخص مذبذب ايمانه مش قوى وده ياريته بصراحه يخرج من ملته المذبذبه لاى مله تانيه لانه ما فيهوش خير وهيضر اكتر ما ينفع
يا اما العيب فى طريقه افهامه دينه يعنى العيب على الكبار البيت اولا ثم المدرسه ثم الشيوخ والقساوسه اللى ما عرفوش يعملوا خطاب دينى محترم يقوى العقيده ...وفالحين بس يبوسوا بعض فى كل محفل ويقولك الهلال والصليب ايد واحده
شىء اخير ...بيشاع وبيقال ان الكنيسه بتعذب اللى بيسيبها للاسلام وقريت حاله من الاستنكار رهيييييييييبه لده من المسلمين!!!
تعجبت طبعا لا لشىء الا للازدواجيه فى الرؤيه
هل يا ترى اللى بيسيب الاسلام للمسيحيه ما بيتعذبش وما بيحصلش فيه نفس الشىء المدعى حصوله من الكنيسه للمسيحى اللى اسلم ...سواء من امن الدوله الله يرحمه او من الاهل او من اى شخص يعلم بتغييره لدينه ...
التنكيل والفضيحه ولو فى مكان بعيد عن العاصمه ممكن توصل للقتل ..؟؟؟
الطرفين بيتبعوا نفس الاسلوب اللى يسيبنا بقى عدونا وكفر لازم نطلع عينه لحد ما يعود
طاب المسلمين زعلانين ليه بقى اذا هم بيتبعوا نفس الاسلوب؟ وللا هى نظره الدين الاعلى ؟ وللا الفوقيه والاعتقاد باننا افضل ؟
طاب لو واحد عاوز يسيب دينه لدين تانى بقلبه وفضل بالشكل مسلم او مسيحى هل ده يجدى؟
وللا هو لازم نظهر خلاف ما نضمر ونعيش الازدواجيه وما نبقاش ناس شفافه كده ومحترمه
انا اعرف شخص غير دينه فى قلبه دون اعلان وبعد ما مات اكتشفنا ده لانه ببساطه ما أمنش على روحه وخاف وفضل عايش بالسر العظيم ده وكأنه مخبى بلوه ...مع ان الدين لله
ربنا اللى بيحاسب يا ساده
مش هيحاسبك ان جارك ساب ملته ولا ابنك بعد ما بلغ سن الرشد غير دينه الا اذا كنت قصرت معاه فى تعريفه بيه ...ولا ان امك او ابوك قالوا لك احنا عاوزين نشوف لنا دين تانى
ربنا هيحاسب كل واحد على ما اقترفت يداه وعلى عمله بنفسه كل نفس بما كسبت رهينه وكل واحد متعلق من عرقوبه
انت مسئول عن نفسك ومجتمعك ...مسئول عن نفسك بعقلك وفعلك وعن مجتمعك بتربيتك لعيالك
كل واحد ياريت يلتفت لنفسه وبيته وعياله ولو رباهم عدل وزى البشر وزى ما الاديان قالت انا واثقه ان لا حد هيغير دينه ولا هيتخطف ولا هيتقتل لانه ببساطه لو كل اب وام عملوا مجهودهم الحقيقى ان عيالهم تعرف دينها زى الناس دون غلو او مغالاه او خنقه ومارسوا الدين السمح قدامهم كقدوه ماحدش هيهرب من دينه لدين تانى
انما شايف دينى جلابيه ودقن شعثاء وقتل وجنازير وكل شىء حرام ماطبعا لازم اهرب ...شايف دينى لبس اسود وحرمانيه فى كل حاجه واعترافات ليل نهار وتعذيب للخلاص وبس ما طبعا لازم اهج
اللين بيزين كل حاجه فى الدنيا... والشده تكسرها
المسيح كان لين هين بشوش سمح الاخلاق والخلق
والرسول كان كذلك تماما فقد اخذ من عيسى جمال اخلاقه ومن موسى شدته ومن يوسف حنكته ومن ابراهيم صبره وطاعته ومن ايوب قبوله للابتلاءات فجاء متمما لمكارم الاخلاق
مافيش اى رسول دعى على الكفار فى بلدته ان ربنا يحرقهم ويولع فيهم ولا امر بقتلهم ولا قال خرجوا من الدين يارب اسخطهم ولما ده حصل فى بنى اسرائيل كان لسبب وحكمه من الله سبحانه وتعالى مش مجال تفسيرها دلوقت
ده على فرض ان فيه كفار اساسا فى مصر ولو حتى فيه كل واحد عقله فى راسه مش محتاج دعوه ولا وعظه ولا اى شىء الحمد لله فيه كتب ومدارس ومواقع عالنت وكل السبل متاحه
كل السبل متاحه عشان الحساب يبقى على حق امام رب العالمين
مش احنا يا ساده اللى هنحاسب ولا معانا توكيل باننا نحفظ الدين
رب الدين قادر على حفظه
الدين هو اللى بيعز الانسان ...لكن لا يعز الدين ابدا بانسان
الحل من وجهة نظرى كعبد فقير هو ترك ما لله لله وترك ما لقيصر لقيصر....افهموها بقى واتشغلوا بحاجه مفيده
الا بالحق هو الحاج ابو علاء اخباره ايه وسط المعمعه دى ...يعنى لاحس ولا خبر ولا وقفات لتعجيل المحاكمه
بيرو اولى ...بيرو اولى... بيرو اولى حتى اخر نفس
No comments:
Post a Comment